کسی پرانی حویلی سے اک دیا نکلا

 کسی پرانی حویلی سے اک دِیا نِکلا

یہ کون میری محبت میں مبتلا نکلا

رفاقتوں کے زمان و مکاں سمجھتے ہوئے

میں ایک روز تمہاری گلی میں جا نکلا

جڑے ہوئے ہیں ابھی بھی مکالمے سے یہ لوگ

تمہارا شہر تو تہذیب یافتہ نکلا

پلٹ کے پھر کبھی آسودگی نہیں آئی

وہ ایک شخص مِری زندگی سے کیا نکلا

کسی سڑک پہ نہ آیا مِری مدد کے لیے

جو نقشِ پا مِرا صحرا میں رہ نما نکلا

پڑے ہوئے تھے انا میں تو کچھ نہ سُوجھتا تھا

ہم اپنے آپ سے نکلے تو راستا نکلا

عابد ملک