آنکھوں میں ایک خواب سی صورت اُتار کر
کہتا ہے کوئی دشتِ تمنا کو پار کر
کل شام مجھ کو پگلی ہوا چُومتی رہی
خُوشبو مِرے وجود کے اندر اُتار کر
دل ہے کسی کی مستی میں دم بخود
اے عشقِ بے پناہ! اسے سنگسار کر
میں نے کہا کہ دید کو مدت گزر گئی
آئی صدائے شوق؛ ابھی انتظار کر
وہ کم سخن جو دل کی گرہیں کھولتا نہیں
خود پر نہ اس کی یاد کو اتنا سوار کر
کیوں رولتی ہے یاد کی تسبیح صبح و شام
اب کیا ملے گا روگ پرانے شمار کر
میں بُوند بُوند تِرے تصرّف میں آئی ہوں
اے رود بارِ عشق! مجھے آبشار کر
صغرا صدف یہ ہجر تِری جان لے گیا
اب شاعری میں دردِ ہُنر آشکار کر
صغرا صدف
صغریٰ صدف
No comments:
Post a Comment