مٹائی سوز محبت میں زندگی میں نے
بہشت اپنی جہنم میں جھونک دی میں نے
نہ چھوڑیں خاک بھی ہو کر تِری گلی میں نے
اجل کو بخش دی بےموت زندگی میں نے
تِرے بغیر جھکایا نہ سر کبھی میں نے
بٹھا کے دل میں تجھے کی ہی بندگی میں نے
گدائی کر کے تِرے در کی بادشاہ بنا
غلامی پائی بہ آداب خواجگی میں نے
وفور شوق نے مہلت نہ دی سمجھنے کی
تلاش تیری کہ اپنی تلاش کی میں نے
تِرے کمال کا مظہر بنا وجود میرا
تِرے جمال کو بخشی ہے زندگی میں نے
صفائے دل کے مقابل ہیں آئینے پانی
ملا دی خاک میں شان سکندری میں نے
تجلیات حقیقت چھپا سکا نہ کبھی
دکھائی دین کے اندر نہ کافری میں نے
ہنسی لبوں پہ، جگر خون، اشک دامن پر
سکھائے گل کو یہ آداب زندگی میں نے
سنا دیا تمہیں پیغام دل، سنو نہ سنو
خدائے عشق کی کر دی پیمبری میں نے
غم فراق میں ہمدم کوئی نہیں ہوتا
اجل کی راہ بھی مر مر کے دیکھ لی میں نے
تِرے کرم کا سہارا ہے اور راہ عدم
متاع جو بھی عمل کی تھی پھینک دی میں نے
غنی جبلپوری
No comments:
Post a Comment