ملاح اپنی کشتی میں غافل پڑا رہا

 ملاح اپنی کشتی میں غافل پڑا رہا

طوفاں میں رہنما مِرا کچا گھڑا رہا

آندھی چلی تو پیڑ جڑوں سے اکھڑ گئے

اِک برگِ خشک تھا جو زمیں پر پڑا رہا

اشکوں کے قافلے تو کہِیں اور بڑھ گئے

آنکھوں میں تیرے جانے کا منظر گڑا رہا

اک موڑ، جس کو چھوڑ کے پانا تھی زندگی

اب تک نجانے کیوں میں وہِیں پر کھڑا رہا

توڑی تھیں جس نے آپ روایات عشق کی

وہ بے وفا بھی رسمِ وِفا پر اڑا رہا

چاہے سبھی بلندیاں تیری پہنچ میں ہوں

مجھ کو یہ حوصلہ ہے مِرا قد بڑا رہا

وہ ہنس دئیے تو شاد! کئی پھول کِھل گئے

دل پر، مگر وہ وقت بہت ہی کڑا رہا

اشرف شاد