اے سرور دیں نور ہے یکسر تری سیرت

عارفانہ کلام نعتیہ کلام

اے سرورِ دیں نور ہے یکسر تِریؐ سیرت​

اقدار کو کرتی ہے منور تری سیرت​

یا خیر کا معمورۂ پُر نور و معنبر​

یا حُسن کا مواج سمندر تری سیرت​

زیبائیِ افکار کا مصدر ترے انوار​

رعنائیِ کردار کا جوہر تری سیرت

​رنگیں چمنستانِ حیات اس کی ضیا سے​

نوریں صفتِ چشمۂ خاور تری سیرت​

ہر بندۂ نادار کی قوت تری رحمت​

ہر رہروِ درماندہ کی رہبر تری سیرت​

آتی ہے نظر پیکرِ جاں میں تری تنویر​

ہر نقش کو کرتی ہے اجاگر تری سیرت​

ہر رہ پہ میرا ہاتھ لیے ہاتھ میں اپنے​

چلتی ہے مِرے ساتھ برابر تری سیرت​

شعر اس کے نہ کیوں ہوں نظر افروز و دلآویز​

تائب کے خیالوں کا ہے محور تری سیرت​

حفیظ تائب