ان کہی
پھر کسی یاد کا بے مہر ہیولا کوئی
میرے یخ بستہ تنفس سے الجھ کر دم بھر
دھیرے دھیرے مِری آنکھوں میں اتر آئے گا
کوئی بے نام سا درد
میرے بے زار رگ و پے میں سمو کر خود کو
توڑ ڈالے گا مِرے ضبط کے تار
اور ماتھے پہ ٹھٹھرتا ہوا موہوم سا لمس
پھر لبِ گرمِ محبت کی دہائی دے گا
میرے ہر خواب کا نشتر ریزہ
چشمِ افسردہ کو خوں رنگ بدھائی دے گا
اور کہیں دور شبِ ہجر کے وحشت زدہ سناٹے میں
اسی سرگوشئ دلبر کی عبث سی خواہش
ہر بُنِ مُو میں سلگ اٹھے گی
مگر
کوئی گویائی نہ شُنوائی کی صورت ہو گی
ہر شبِ عہدِ گزِشتہ کی طرح
دلِ وحشی کی تمنائے زبوں
ان کہی ان سُنی رہ جائے گی
شاہین کاظمی
No comments:
Post a Comment