ایسے مجمع ہے رقیبوں کا مِرے یار کے گرد
جیسے مزدور اکٹھے ہوں کسی کار کے گرد
ان میں بس ایک ہی منت تھی بنا حرص و ہوس
ورنہ دھاگے تو بہت لٹکے تھے دربار کے گرد
ہم کہ دشمن کو ڈرانے کا ہنر جانتے ہیں
خون اپنا ہی لگا لیتے ہیں تلوار کے گرد
لوگ سمجھے کہ بڑی جاں ہے اداکاری میں
اور وہ آگ حقیقت تھی اداکار کے گرد
ایسا منظر کہ فرشتے بھی اتر کر دیکھیں
یار چاروں ہی اگر بیٹھے ہوں سرکار کے گرد
غار جس غار میں آقا پہ وحی اتری تھی
آیتیں اب بھی مہکتی ہے اُسی غار کے گرد
احمد آشنا
No comments:
Post a Comment