اکیلے پن سے مسافت میں ڈر سا لگتا ہے

 اکیلے پن سے مسافت میں ڈر سا لگتا ہے

ہر ایک دشت مجھے اپنا گھر سا لگتا ہے

جو اتنی سردی میں بھی خون گرم رکھتا ہے

مِری رگوں میں رواں کچھ شرر سا لگتا ہے

بدل گئے ہیں معانی ہر ایک جملے کے

کہ لفظ حاملِ خوف و خطر سا لگتا ہے

پرندے دیکھ کے صیاد کو تمام اڑے

نہیں جو اڑ سکا بے بال و پر سا لگتا ہے

میرے غموں سے بھی اب پھوٹنے لگی شاخیں

اُگا ہوا میرے اندر شجر سا لگتا ہے

رجب چوہدری