تاجدار نبوت پہ لاکھوں سلام

عارفانہ کلام نعتیہ کلام

تاجدارِ نبوتؐ پہ لاکھوں سلام

شہر یارِ نبوتؐ پہ لاکھوں سلام

سید الاولیںﷺ، سیدالآخریںﷺ

نامدارِ نبوتؐ پہ لاکھوں سلام

فخرِ اولاد آدمؑ پہ اربوں درود

افتخارِ نبوتؐ پہ لاکھوں سلام

وہ براہیمیؑ و ہاشمیؑ خوش نسب

شاہوارِ نبوت پہ لاکھوں سلام

وہ جب آئے جہاں میں بہار آ گئی

نو بہارِ نبوت پہ لاکھوں سلام

جلوہ گاہِ محمدﷺ، وہ غارِ حرا

جلوہ زارِ نبوت پہ لاکھوں سلام

جبرئیلِ امیںؑ،۔ مرحبا، مرحبا

راز دارِ نبوت پہ لاکھوں سلام

نور پاشِ رسالت پہ دائم درود

نور بارِ نبوت پہ لاکھوں سلام

کعبۃ اللہ حصنِ حصینِ یتیم

سایہ دارِ نبوت پہ لاکھوں سلام

وہ جو فاران کی چوٹیوں سے اٹھا

شہسوار نبوت پہ لاکھوں سلام

ہر نبیؑ کی رسالت ہوئی معتبر

اعتبارِ نبوت پہ لاکھوں سلام

جس پہ ختمِ نبوت کا دار و مدار

اس مدارِ نبوت پہ لاکھوں سلام

روکشِ حسنِ یوسفؑ ہے جس کا جمال

اس نگارِ نبوت پہ لاکھوں سلام

سدرۃ المنتہیٰ جس کی گردِ سفر

راہوارِ نبوت پہ لاکھوں سلام

بدر میں تو نزولِ ملائک ہوا

کارزارِ نبوت پہ لاکھوں سلام

کیا کہوں جو احد سے محبت رہی

کوہسارِ نبوت پہ لاکھوں سلام

وہ جو پائے مبارک کی زینت رہا

اس غبارِ نبوت پہ لاکھوں سلام

کوئی دیکھے رفاقت ابوبکرؓ کی

یارِ غارِ نبوت پہ لاکھوں سلام

اللہ، اللہ! فاروقؓ کا دبدبہ

دی وقارِ نبوت پہ لاکھوں سلام

بہرِ عثمانؓ رضواں کی بیعت ہوئی

جاں نثارِ نبوت پہ لاکھوں سلام

مرتضیٰؓ بابِ شہرِ علومِ نبیﷺ

شاہکارِ نبوت پہ لاکھوں سلام

جس دو پھول پیارے حسنؑ اور حسینؑ

شاخسارِ نبوت پہ لاکھوں سلام

ہر صحابی نبیﷺ پر تصدق رہا

جاں سپارِ نبوت پہ لاکھوں سلام

ساری امت پہ ہوں ان گنت رحمتیں

پاسدارِ نبوت پہ لاکھوں سلام

جس کو ترسا کیے چشم و دل اے نفیس

اس دیارِ نبوت پہ لاکھوں سلام

نفیس الحسینی