دل میں جھانکا تو بہت زخم پرانے نکلے
اک فسانے سے کئی اور فسانے نکلے
خواب تو خواب تھے آنکھوں میں کہاں رک جاتے
وہ دبے پاؤں انہیں بھی تو چرانے نکلے
دیکھنا یہ ہے ٹھہرتا ہے کہاں جوش جنوں
سر پھرے شہر نگاراں کو جلانے نکلے
اپنے گھر سنگ ملامت کی ہوئی ہے بارش
بے گناہی کی سند ہم جو دکھانے نکلے
کاروبار رسن و دار کی تشہیر ہوئی
سرفروشی کے یہاں کتنے بہانے نکلے
جن کتابوں پہ سلیقے سے جمی وقت کی گرد
ان کتابوں ہی میں یادوں کے خزانے نکلے
وہ ستم کیش بہر حال ستم کیش رہے
درد سویا بھی نہیں تھا کہ جگانے نکلے
ہر طرف شہر میں ویرانی کا عالم ہے رضا
زندگی کون کہاں تجھ کو سجانے نکلے
رضا امروہوی
No comments:
Post a Comment