دل کی ضد تھی کہ اسے بھی تو ستایا جاتا

 دل کی ضد تھی کہ اسے بھی تو ستایا جاتا

وہ جو ملتا تو اسے حال سنایا جاتا

بارے تکمیلِ جنوں عشق کے ویرانوں میں

ہوں جہاں اس سے تو واپس نہیں آیا جاتا

پا شکستہ ہوں کچھ ایسا کہ سر پھوڑنے کو 

کسی دیوار تلک بھی نہیں جایا جاتا

تشنہ امید لیے سوئے فلک تکتا ہوں 

میرے گھر سے نہیں آلام کا سایا جاتا

ضعف و معذوری نے اس درجہ کیا ناکارہ

اب تو محبوب کے در تک نہیں جایا جاتا

شبِ خاموش کے لہجے ہی سے گھبراتا ہوں

بارِ افسردگی کس طور اٹھایا جاتا

کتنی صدیوں کا ہے جو بوجھ اٹھائے ہوئے ہوں 

دشتِ وحشت کا نہیں حال سنایا جاتا

گرچہ تخفیفِ گنہ سُوجھ رہی ہے مجھ کو

سُوئے مے خانہ مگر اب نہیں جایا جاتا

آبرو ہی کا تقاضہ ہے یہ محبوبِ حزیں 

کبھی مقتل میں نہیں جسم بچایا جاتا

محبوب خزاں