میں صرف اپنا نہیں سب کا درد جانتا ہوں

 ہرا کہاں ہے کہاں لاجورد جانتا ہوں

میں صرف اپنا نہیں سب کا درد جانتا ہوں

جو تُو نے مار دئیے ان کا بھی پتہ ہے مجھے

سسک رہا ہے جو، اک ایک فرد جانتا ہوں

ہماری چیخوں پہ تُو نے، ہماری ہچکیوں پر

کہاں کہاں سے اچھالی ہے گرد جانتا ہوں

شکم کی آگ کو دیتا ہے تُو ہوا کیسے

تُو کیسے کرتا ہے جسموں کو سرد جانتا ہوں

کہاں پہ تُو نے مجھے چھوڑنے کا سوچا تھا

کہاں ہوا تھا تِرا رنگ زرد، جانتا ہوں

یہ شہر کوفے سے بڑھ کر ہے بیوفا، بے حس

تُو غم نہ کر دلِ حیرت نورد! جانتا ہوں

ہے کون کون مِرے ساتھ سب پتہ ہے مجھے

ہے کون کون مِرا ہم نبرد جانتا ہوں

وہ نرم خو جسے آتا ہو لڑنا ظالم سے

میں اس طرح کے بہادر کو مرد جانتا ہوں

فرحت عباس شاہ