تم نے چھتری کاٹ کر ایک چھوٹی سی پتنگ بنائی

 پتنگ

تم نے چھتری کاٹ کر ایک چھوٹی سی پتنگ بنائی

اور پھر اسے بڑے آسمان پر اڑانے لگے

آسمان جو پہلے بادلوں سے بھرا تھا

اب رنگ برنگی پتنگوں کے مقابل تھا

جب پتنگیں پینترا بدل کر شکنجہ کَستیں

 اور آپس میں گتھم گتھا ہونے لگتیں

تمہارے جسم میں خوف کی ایک لہر اترتی 

کیونکہ تمہیں ہمیشہ ہارنے کی عادت تھی

ہار کا زیادہ دکھ تب ہوتا ہے

جب لوگ آپ کو دیکھ رہے ہوں

لیکن اب صرف لوگ ہی نہیں

تمہیں آسمان بھی دیکھ رہا تھا

تم نے کھیل جاری رکھا

ڈور کی کمان کھینچی

ترازو پر تولا

یہ پیچہ، وہ پیچہ کا شور بلند ہوا

سبھی اپنے داؤ پیچ آزماتے رہے

پتنگوں سے پتنگیں اُلجھتی رہیں

اور پھر تمہاری ڈور کٹ گئی

آسمان بے رحم تھا

اگر چاہتا تو سیٹی بجاتا 

اور بادل اپنے پَر لہراتے سٹپٹاتے، دوڑتے آتے

اور مینہ برسنے لگتا

لیکن آسمان کے چاہنے سے کیا ہوتا ہے

جب تمہارے ہی دل میں چاہت نہیں

جس لڑکی کی چھتری کاٹ کر تم نے پتنگ بنائی

اس کا دل بھی ڈور کی طرح کٹ گیا تھا

ثمر علی

ثمر محمد علی