ہر اک ڈوبتے کا سہارا محمد

  عارفانہ کلام حمد نعت منقبت

ہر اک ڈوبتے کا سہارا محمد

ہے طوفاں زدوں کا کنارا محمدﷺ

فرشتوں سے اونچا ہمارا محمدﷺ

خدائے دو عالم کا پیارا محمدﷺ

ہے عاشق کا خلدِ نظارا محمدﷺ

ہمارا محمدﷺ ہمارا محمدﷺ

ثنا خواں ہیں اس کے زمیں بھی فلک بھی

درود اس پہ پڑھتے ہیں جن و ملک بھی

اسی کی مہک ہے گلوں کی مہک بھی

اسی کی چمک مہر و مہ کی چمک بھی

وہ ہستی کی آنکھوں کا تارا محمدﷺ

ہمارا محمدﷺ ہمارا محمدﷺ

شفا بخش وہ دل کی بیماریوں کا

وہ دارو تھا انساں کی لاچاریوں کا

وہ شیدا وفا اور رواداریوں کا

وہ ہے دھونے والا گنہگاریوں کا

مرض کی شفا دکھ کا چارا محمدﷺ

ہمارا محمدﷺ ہمارا محمدﷺ

محبت کا پُتلا، وہ حکمت کا بانی

سنا حق کا پیغام جس کی زبانی

ہے جب تک کہ باقی یہ دنیائے فانی

نہ پیدا کرے گی محمدﷺ کا ثانی

نہ اب خود ہی آئے دوبارا محمدﷺ

ہمارا محمدﷺ ہمارا محمدﷺ

وہ انسانِ کامل، وہ معراجِ انساں

وہ تنویرِ خالق، وہ تقدیرِ دوراں

کلامِ محمدﷺ ہے پیغامِ یزداں

محمدؐ کی سیرت ہے خود عینِ قرآں

ہے قرآں کا ہر اک سپارا محمدﷺ

ہمارا محمدﷺ ہمارا محمدﷺ

وہ عاصی کو عصیاں میں کیوں چھوڑ دیتا

گنہ سے نہ کیوں اس کا رخ موڑ دیتا

وہ طوقِ غلامی نہ کیوں توڑ دیتا

محبت سے کیوں کر نہ دل جوڑ دیتا

وہ دونوں جہانوں کا پیارا محمدﷺ

ہمارا محمدﷺ ہمارا محمدﷺ

خلیفہ عبدالحکیم