ابد آثار ہے تیری خدائی

 عارفانہ کلام حمد نعت منقبت

ابد آثار ہے تیری خدائی

ابد آثار ہیں مالک

تِری قدرتِ کامل کے کرشموں سے

جلوہ آرائی کرتے مناظر

یہ ایٹم سا اک نا چیز ذرہ

اور اس ذرے میں کائنات کے پہلو بہ پہلو ایک مرکز

جو درجنوں اجزاء سے مرکب ہے

اور اس مرکز کے بہر طرف

الیکٹران اور اس جیسے کتنے ہی

غیر مرئی اجزاء یوں گردش کر رہے ہیں

کہ جیسے نظامِ شمسی کے سیارے

سورج کے گرد

اور ایک خلیہ ہے

جو جاندار اشیاء کے جسم کی اکائی ہے

مگر پوری خدائی ہے

مگر کرداروں کا لامحدود سلسلہ ہے

بتایا جا رہا ہے

ہزاروں کیریکٹر ہیں

جو اک خلیۂ ناچیز سے منسلک ییں

اور وراثت اگلی نسلوں تک منتقل کر رہے ہیں

ابد آثار ہیں مالک

یہ سب مظاہر

یہ اک زنجیرِ کشش میں باہم جُڑے اجسام

یہ زندگی، یہ موت

یہ خواہشات کے بیکراں سمندر

کہ جن میں اُٹھتے مد و جزر

ہنگامہ پرور ہیں ازل سے

خدایا! ان گنت کہکشاؤں اور ستاروں کے خدا

میرے لفظوں کو حُرمت کر دے عطا

اگر کچھ بھی نہیں بے معنی کائنات میں تیری

اگر میں بھی اکائی ہوں

کروڑوں خلیات اور ایٹموں سے

اگر مجھ کو بھی بنایا گیا ہے

یقیناً کوئی مقصد بھی رکھا گیا ہے

مجھے تفہمِ تخیلقِ جسم و جاں دے

ابد آثار دُنیائیں ہیں تیری

مجھے بھی شعورِ زندگی عطا کر

بخش دے اشیاء کی وجہ کُن کا ادراک

خدایا

خدایا

خدایا

سراپا التماس و دُعا ہوں

اشرفِ تخلیق ہوں تو کیونکر

خسارے میں رہا ہوں

مجھے رازِ درونِ کُن عطا کر

مجھے جو لوگ خاکِ راہ یا گردِ سفر کہتے نہیں تھکتے

انہیں بتلاؤں

کہ حرف و صوت و آہنگ کا تقدس کس کو کہتے ہیں

جو انسانوں کی بقاء سے جُڑا ہے

رشتۂ محبت

اسے لفظوں کا لبادہ کیسے دینا ہے

الہیٰ! سر بسر عجز ہوں

سراپا التجا ہوں

بشر ہوں

اور شعورِ راستی مانگتا ہوں

شاہ روم ولی

ولی شاہ