بن جاؤں میں بھی زائر طیبہ خدا کرے

 عارفانہ کلام حمد نعت منقبت

بن جاؤں میں بھی زائرِ طیبہ خدا کرے

واپس نہ لوٹ پاؤں کچھ ایسا خدا کرے

سر فخر سے بلند ہو میرا بھی گر مجھے

اس سنگِ در کا ناصیہ فرسا خدا کرے

ٹوٹے تو ٹوٹ جائے طنابِ نفس، مگر

ٹوٹے نہ ان کے ذکر سے رشتہ خدا کرے

آباد جس سے قلبِ اویس و بلالؓ تھا

وہ سوز میرے دل میں بھی پیدا خدا کرے

جب بھی غمِ فراق سے چہرہ ملول ہو

دینے کو آپﷺ آئیں دلاسا خدا کرے

آغوش میں جب آئے قضا لینے کو مجھے

پیشِ نظر ہو آپﷺ کا جلوہ خدا کرے

جس کو تمہاری پشت پناہی نصیب ہے

حاشا کہ دہر میں اسے رسوا خدا کرے

فکر و نظر کو پھر سے نئی تازگی ملے

پھر آئے ان کی یاد کا جھونکا خدا کرے

رضوی نکھار آئے مِرے فن میں ، دن بدن

توفیقِ نعت میں ہو اضافہ خدا کرے

نورالہدیٰ رضوی