بلندی پہ میرا ستارہ کھڑا ہے

 عارفانہ کلام حمد نعت منقبت

بلندی پہ میرا ستارہ کھڑا ہے

سہارا محمدﷺ کا جب سے ملا ہے

مجھے نعت پھر سے عطا ہو رہی ہے

مِرا رابطہ مصطفیٰﷺ سے جڑا ہے

خدا عظمتیں خود ہی جانے نبیﷺ کی

عقیدت سے ہم نے یہ ہدیہ لکھا ہے

میں نازاں مقدر پہ ہوں کے مجھے تو

محمدﷺ کی اُمّت کا رتبہ ملا ہے

خدایا! ملے فیض نسلوں کو میری 

عطا ہو محبت نبیﷺ کی، دعا ہے

چمک پا رہا ہے یہ چہرہ مِرا جو

نگینہ مُزمّلﷺ سے دل کا جڑا ہے

بہاروں کو پھر تازگی مل گئی ہے

مہک سے نبی کی چمن کھل اٹھا ہے

صائمہ جبین مہک