جو بھی شہ بطحا سے محبت نہیں کرتے

 عارفانہ کلام حمد نعت منقبت

جو بھی شہ بطحاﷺ سے محبت نہیں کرتے

ہم ان کی زمانے میں حمایت نہیں کرتے

سرکارﷺ کے ٹکڑوں پہ سدا پلتے رہے ہیں

پر ان کی ہی سنت کی اطاعت نہیں کرتے

اے رحمتِ عالمﷺ شبِ معراج کے دولہا

ہم آپﷺ کی الفت سے تجارت نہیں کرتے

ہو جائے عطا آپﷺ کا ایک بوند پسینہ

ہم کوثر و تسنیم کی چاہت نہیں کرتے

دیکھیں گے سرِ حشر وہ دوزخ کے نظارے

اصحاب محمدﷺ کی جو عزت نہیں کرتے

کونین میں تم ایک ہی شہ مجھ کو دکھا دو

جن پر مِرے سرکارﷺ حکومت نہیں کرتے

ہم حشر تلک کیسے بھلا رہتے لحد میں

گر قبر میں آقاﷺ کی زیارت نہیں کرتے

ہم پُل سے گزرتے تو بھلا کیسے گزرتے

سرکارﷺ اگر چشمِ عنایت نہیں کرتے

میں بھی تو جہنم میں ہی جاتا سرِ محشر

جو میری طرف آقاﷺ اشارت نہیں کرتے

ہے ان میں لہو سیدِ کونینﷺ کا تفسیر

سادات کی ہم لوگ اہانت نہیں کرتے

تفسیر رضا امجدی