لاش اب تک صلیب پر ہے

 حیات

لاش اب تک صلیب پر ہے

یسوعؑ کے ہاتھوں میں پیوست میخوں سے

خون اب تک ٹپک رہا ہے

جوان بیٹوں کی موت پر ان سِسکتی ماؤں کی 

گُنگ آنکھوں کی چیخ سُن لو

تو بی بی مریمؑ کا کرب کیا تھا، سمجھ سکو گے

غریب والد خُود اپنی تُربت کا زندہ کتبہ بنا ہُوا ہے

کوئی دلاسہ نہ کام آئے

کوئی یہ اُس ماں کے دل سے پُوچھے

کہ زندہ ہو کر خُود اپنے لاشے تلے

یوں دھنس جانے کا رنج کیا ہے

لاش اب تک صلیب پر ہے

سمے ہے اب بھی

چرن چھُوئیں ہم یسوعؑ کے اور

اپنے دل سے عصبیّت کی تمام میخیں نکال آئیں

جو ظُلم زادے محبتوں کے چراغ روندیں

یہ اُن کے ذہنوں میں گاڑ آئیں

حیات کی زندگی بچائیں

عمران ثاقب