رسول پاک کی نعتیں سنانے آئے ہیں

 عارفانہ کلام حمد نعت منقبت

رسولِ پاکﷺ کی نعتیں سُنانے آئے ہیں

ہم اُن کے ذکر کی محفل سجانے آئے ہیں

اُنہی کے آنے سے روشن یہ کائنات ہوئی

وہ ظلمتوں کے بُتوں کو مٹانے آئے ہیں

مِرے حضورﷺ کے سائے کو مختصر نہ کرو

کہ وہ تو سارے زمانوں پہ چھانے آئے ہیں

وہ تاجوَر ہو سکندر ہو یا گدا کوئی؟

نبیﷺ کے دَر پہ سبھی سَر جھکانے آئے ہیں

ظہورِ پاکﷺ پہ آدمؑ سے لے کے عیسیٰ تلک

سلامی دینے کو سارے زمانے آئے ہیں

بچا کے تیرہ شبی کی ہر اک نحوست سے

حریمِ دل کو وہﷺ کعبہ بنانے آئے ہیں

نبیﷺ کے ذکر کو زحمت سمجھنے والو سُنو

وہ زحمتوں ہی سے ہم کو بچانے آئے ہیں

رہے حضورﷺ سے نسبت سدا ہمیں اطہر

وہی تو ہیں جو ہمیں بخشوانے آئے ہیں

اطہر علی