ترا خیال سر شام غم سنورتا ہوا

تِرا خیال سرِ شام غم سنورتا ہوا

بہت قریب سے گزرا سلام کرتا ہوا

جھجک رہا تھا وہ مجھ سے نظر ملاتے ہوئے

کہ میں بھی تھا اسی خاکے میں رنگ بھرتا ہوا

مسافتیں بھی بہت اور سخت راہوں سے

گزر گیا ہے وہ مجھ کو تلاش کرتا ہوا

رقم ہوا نہیں اب تک نصابِ ہمسفری

وہ قافلہ بھی ملا جب تو کوچ کرتا ہوا

عجب سفر ہے، کہ شامِ مقتل تک

پہنچ گیا ہوں میں ہر موڑ پر ٹھہرتا ہوا

کنارہ تھا مرے دریا سے کٹ گیا وہ شخص

کہ میں تھا وقت کی سرحد کو پار کرتا ہوا

مظہر امام