بدمست شوق شاہد کون و مکاں ہے آج

بد مستِ شوق شاہدِ کون و مکاں ہے آج 

شاید فضا میں جذب مۓ ارغواں ہے آج

جو پندِ عقل و ہوش ہے وہ رائیگاں ہے آج 

حرفِ جنوں کے آگے خِرد بے زباں ہے آج 

برقِ جفا بھی خوف سے گِرتی نہیں جہاں

اک ایسی شاخِ گل پہ مِرا آشیاں ہے آج

ہونٹوں پہ آ رہا ہے مِرے نغمۂ نشاط

دم خم تِرا وہ، اے غمِ دوراں! کہاں ہے آج

تارے اتر کے آئے ہیں گردوں سے خاک پر

پستی ہے سر بلند، زمِیں آسماں ہے آج

ہے زشت و بد پہ چھائی ہوئی خوبئ نگاہ

اپنی جگہ حسِین ہے، جو شے جہاں ہے آج

ہر برگِ گل کے دل میں ہیں آباد گل کدے

پِنہاں ہر ایک لفظ میں اک داستاں ہے آج

رقصاں ہے روحِ نشو و نما بھی ہوا کے ساتھ

جو غنچہ کھل رہا ہے وہ اک گلستان ہے آج

شائستۂ نگاہ عنایت ہوا ہے دل

ہر ریزۂ صدف پہ گہر کا گماں ہے آج

اپنی خوشی وہی ہے، جو ہے غیر کی خوشی

اپنا وہی ہے غم، جو غمِ دِیگراں ہے آج

حرفِ غلط کی طرح مٹا فرقِ بیش و کم

موضوعِ لفظ سُود ہے، مہمل زِیاں ہے آج

ہر بے ثبات چیز کو حاصل ہے اب ثبات

جو لمحہ بھی گزرتا ہے وہ جاوِداں ہے آج

رخسارِ زندگی سے خجل ہے غرورِ مہر

شامِ وصال مثلِ سحر ضوفشاں ہے آج

ہے مطربِ رباب طرب، وقت شاد کام 

کل تک جو میہماں تھا وہی میزباں ہے آج 

ہونے لگا ہے شوق کا افسانہ پھر طویل

شاید تِری نگاہ بہت مہرباں ہے آج

میری جبیں تھی اور تِرا آستاں تھا کل

تیری جبیں ہے اور مِرا آستاں ہے آج

مظہر امام​