مرا ساتھ ابھی مت چھوڑ پیا

مجھے سانسوں کی ہے تھوڑ پیا

مِرا ساتھ ابھی مت چھوڑ پیا

کَری منت، زاری، ترلے سب

میں نے ہاتھ دئیے ہیں جوڑ پیا

مِری مانگ سندور سےخالی کر

ہَری چُوڑی آ کر توڑ پیا

کہیں پربت پار میں بس جاؤں

جہاں دِکھے نہ مِرا کوڑھ پیا

میں نے پگ پگ تیری بلائیں لیں

میں نے پھونکے وِرد کروڑ پیا

مِری آس کی سانس اکھڑتی ہے

تو مُکھ اپنا نہ موڑ پیا

تِرا ہجر وچھوڑا مار گیا

لیا سارا لہو نچوڑ پیا

مِری آنکھیں رو رو خاک ہوئیں

مِرے اشک نہ ایسے روڑ پیا

تِرے سکے مجھ کو سونا ہیں

چل ماٹی مٹکی پھوڑ پیا

مِرا حال دھمال ہے جوگن سا

میں نے وجد لیا ہے اوڑھ پیا

ہے یہ پریم جنم جنماتا کا

مجھے سات جنم تِری لوڑ پیا

انجیل صحیفہ