غلط نکلے سب اندازے ہمارے
کہ دن آئے نہیں اچھے ہمارے
سفر سے باز رہنے کو کہا ہے
کسی نے کھول کر تسمے ہمارے
ہر اک موسم بہت اندر تک آیا
کھلے رہتے تھے دروازے ہمارے
اگر ہم پر یقیں آتا نہیں، تو
کہیں لگوا لو انگوٹھے ہمارے
بشارت دی ہے آزادی کی اس نے
ہوا میں پھینک کر پنجرے ہمارے
اس ابرِ مہرباں سے کیا شکایت
اگر برتن نہیں بھرتے ہمارے
مہینے بعد بیٹی سے ملا ہوں
ہمیں لے دے گئے جھگڑے ہمارے
تہذیب حافی
No comments:
Post a Comment