یہ مری ضد ہے کہ ملتان نہیں چھوڑوں گی

 یہ مِری ضد ہے کہ ملتان نہیں چھوڑوں گی

مر تو جاؤں گی تِری جان نہیں چھوڑوں گی

عشق لایا تھا مجھے گھیر کے اپنی جانب

اس منافق کا گریبان نہیں چھوڑوں گی

یہ تو ترکہ ہے جو پُرکھوں سے ملا ہے صاحب

دشت کو بے سر و سامان نہیں چھوڑوں گی

یہ نہ ہو سین بدلتے ہی بچھڑ جائے تُو

ہاتھ میں خواب کے دوران نہیں چھوڑوں گی

اب نہ کمزور ہوں میں، اور نہ ڈرنے والی

دشمنا! ہار کے میدان نہیں چھوڑوں گی

اے خوشی پھر تُو صدا دے کے کہیں چھپ گئی ہے

ہاتھ تو لگ، میں ترے کان نہیں چھوڑوں گی

صرف اس بار اگر وصل عطا ہو جائے

آئندہ ہجر کا امکان نہیں چھوڑوں گی

کومل جوئیہ