تم خوش جمال ہو تو ثبوت جمال دو​

 تم خوش جمال ہو تو ثبوتِ جمال دو​

میں تیرہ بخت ہوں مِری قسمت اجال دو​

ایسی خوشی نہ دو جو ہو باعثِ ملال ​

جو وجہِ سرخوشی ہو مجھے وہ ملال دو​

جس میں تمہارے حسن کے سب خدوخال ہوں ​

ایسا کوئی سخن، کوئی ایسا خیال دو​

آنکھوں کو سونپ دو غمِ دوراں کی سب کشش​

یہ جبر، اختیار کے سانچے میں ڈھال دو​

جامِ جہاں نما سے مجھے کچھ غرض نہیں​

میں مشتِ خاک ہوں مجھے جامِ سفال دو​

اس روئے خوش جمال سے مَس ہو کے آئی ہو​

اے دل رُبا ہواؤ! نویدِ وصال دو​

سچا سخن سناتا ہے اس دور میں ایاز ​

اس بے ادب کو بزمِ سخن سے نکال دو​

​

ایاز صدیقی​