آنکھوں میں کہیں اس کے طوفاں تو نہیں تھا
وہ مجھ سے جدا ہو کے پشیماں تو نہیں تھا
کیوں مجھ سے نہ کی اس نے سرِ بزم کوئی بات
میں سنگِ ملامت سے گریزاں تو نہیں تھا
ہاں حرفِ تسلی کے لیے تھا میں پریشاں
پہلو میں مِرے دل تھا، کہستاں تو نہیں تھا
کیوں راستہ دیکھا کیا، اس کا سرِ شام
بے درد کا مجھ سے کوئی پیماں تو نہیں تھا
جلوہ تھا تِرا آگ میں ہر لحظہ ہویدا
ورنہ مجھے جل مرنے کا ارماں تو نہیں تھا
تھا دل بھی کبھی شہرِ تمنا سے مماثل
یہ قریہ ہمیشہ سے بیاباں تو نہیں تھا
طوفانِ الم! کیوں مجھے ساحل پہ اتارا
میں شورِ تلاطم سے ہراساں تو نہیں تھا
عرش صدیقی
No comments:
Post a Comment