بچھڑا ہوا موجود ہے

 بچھڑا ہوا موجود ہے

جانے والے تو گیا کب ہے

مِرے دامن میں

تیرے خوش رنگ دلاسوں کا دھواں جاگتا ہے

میرے جوتوں میں تِرے پاؤں پڑے ہیں اب تک

آج بھی میں انھیں دھو دھو کے پیا کرتا ہوں

تیری خوشبو پہ کبھی گرد نہیں جمنے دی

تیری پھینکی ہوئی باتوں کو لبوں میں بھر کر

تیرے لہجے کی شباہت میں

اتر جانے کا

لطف وہ جانے جسے ہجر ملے

تیرے کاٹے ہوئے موسم سے کوئی دَھجی اگر

ہاتھ آئے تو ذخیرہ اسے کر لیتا ہوں

تیری اُترن سے اٹھاتا ہوں نئی دَھج کا جواز

تیرے دیکھے ہوئے خوابوں پہ مجھے نیند آئے

میرے آئینے میں روشن ہے ابھی تیرا وجود

رات ہوتی ہے تو بستر پہ رکھا تیرا خیال

میرے سینے کے جزیرے سے لپٹ جاتا ہے

جانے والے تُو گیا کب ہے

مِرے ہاتھوں سے

تیرے بوسوں کی ابھی تازہ مہک آتی ہے

منیر جعفری