پاس ناموس تمنا ہر اک آزار میں تھا

 پاسِ ناموسِ تمنا ہر اک آزار میں تھا

نشۂ‌ نکہتِ گل بھی خلشِ خار میں تھا

کس سے کہیے کہ زمانے کو گراں گزرا ہے

وہ فسانہ کہ مِری حسرتِ گفتار میں تھا

دل کہ آتا ہی نہیں ترکِ تمنا کی طرف

کوئی اقرار کا پہلو تِرے انکار میں تھا

کچھ تجھے یاد ہے اے چشم‌ زلیخائے جہاں

ہم سا یوسف بھی کوئی مصر کے بازار میں تھا

زندگی جا نہ سکی شام و سحر سے آگے

سارا عالم اسی آئینۂ تکرار میں تھا

عمر بھر چشمِ تماشا کو رہی جس کی تلاش

ہوش وہ حسنِ گریزاں مِرے اشعار میں تھا

ہوش ترمذی