بے کیف ہیں یہ ساغر و مینا ترے بغیر​

 بے کیف ہیں یہ ساغر و مینا تِرے بغیر​

آساں ہوا ہے زہر کا پینا ترے بغیر​

کیا کیا تِرے فراق میں کی ہیں مشقتیں​

اک ہو گیا ہے خُون پسینہ ترے بغیر​

جچتا نہیں ہے کوئی نِگاہوں میں آج کل​

بے عکس ہے یہ دیدۂ بینا ترے بغیر​

کن کن بلندیوں کی تمنا تھی عشق میں​

طے ہو سکا نہ ایک بھی زِینہ ترے بغیر​

تُو آشنائے شدتِ غم ہو تو کچھ کہوں​

کتنا بڑا عذاب ہے جینا ترے بغیر​

ساحل پہ کتنے دیدہ و دل فرشِ راہ تھے​

اُترا نہ پار دل کا سفینہ ترے بغیر​

باقی کسی بھی چیز کا دل پر اثر نہیں​

پتھر کا ہو گیا ہے یہ سینہ ترے بغیر​

باقی احمد پوری