اب تو تقلید کے زنداں سے نکلنے دو مجھے

اب تو تقلید کے زِنداں سے نکلنے دو مُجھے

وقت بدلا ہے تو تھوڑا سا بدلنے دو مجھے

میں کہاں اور کہاں وقت کے نمرُود کی آگ

اپنے ہی شعلۂ احساس میں جلنے دو مجھے

کس لیے آ کے کھڑی ہے مِرے آگے ظُلمت

میں تو سُورج ہوں نکلنا ہے نکلنے دو مجھے

چُھوٹ جائے نہ کہیں ہاتھ سے دامان وفا

کچھ تو اے گردش ایام! سنبھلنے دو مجھے

مجھ کو منظور نہیں غیر کا قالب ہرگز

اپنے ٹُوٹے ہوئے سانچے ہی میں ڈھلنے دو مجھے

خواب کی دُھند ہے کچھ دیر میں چھٹ جائے گی

سو کے اُٹھا ہوں ذرا آنکھ تو مَلنے دو مجھے

ہو گا عرفانِ حقیقت بھی کسی دن احمد

کوچۂ وہم و گُماں سے تو نکلنے دو مجھے

الطاف احمد اعظمی