اندازہ غلط تم نے لگایا مِرے قد سے
جولانی میں دریا بھی نکل جاتا ہے حد سے
اے دنیا سہارا ہے یہی سوچ کے تجھ کو
چلتا ہے تِرا کام اسی داد و ستد سے
ہم اہلِ جنوں پاؤں تو کیا اپنی نظر بھی
دو کوس پرے رکھتے ہیں اس دامِ خِرد سے
وحشت کا علاقہ مِرا اپنا بھی کوئی ہو
نِسبت ہی نہیں کوئی مجھے مسندِ جد سے
پانی کی طرح تیز ہوں مٹی کی طرح سخت
انبوہِ غزالاں! ذرا بچنا مِری زد سے
ہنستا ہے خدا ہم پہ ہمیں دیکھ کے ضیغم
تسلیم کیے جاتے ہیں مجھ کو مِرے رد سے
سعد ضیغم
No comments:
Post a Comment