کب یہ مرے حریف کے گوشہ نشین ہیں

 کب یہ مِرے حریف کے گوشہ نشین ہیں

میرے سبھی عزیز تہِ آستین ہیں

مدت سے تُو ملا، نہ کسی اور کا ہُوا

ہم مستقل تناؤ کے کب سے مکین ہیں

کہتے ہیں ہر کسی سے کہ فرصت نہیں مگر

ہم لوگ کائنات میں فارغ ترین ہیں

ممکن نہیں کہ ساتھ نبھائیں تمام عمر

ممکن بھی کس طرح ہو کہ دونوں ذہین ہیں

میں ان دنوں بہت سے مسائل میں ہوں گھِرا

تُو نے بچھڑنا ہے تو یہ دن بہترین ہیں

پربت پہ اس کے ساتھ میں پھرتا ہوں اس طرح

جیسے کسی رومانوی مووی کے سین ہیں

اپنی نظر کی حد میں نہیں آ سکے جو لوگ

شاید وہ اس جہان سے باہر مکین ہیں

اس بات پر تمام ہے تعریفِ آدمی

احساس گر نہ ہو تو بشر بھی مشین ہیں

زوہیر عباس