تمہارا عہد تھا جو بار بار ٹوٹ گیا

 تمہارا عہد تھا جو بار بار ٹُوٹ گیا

سو آج تم سے مِرا اعتبار ٹوٹ گیا

نہ پوچھ ہم سے جدائی کا اور کوئی سبب

تھا ایک رشتۂ ناپائیدار ٹوٹ گیا

چھلک رہی ہے مۓ لالہ فام آنکھوں سے

مثالِ شیشہ دلِ بے قرار ٹوٹ گیا

اسے تو مالی بھی کچرے میں پھینک آتا ہے

وہ گُل کہ شاخ سے جو ایک بار ٹوٹ گیا

وہ ساز چھیڑا کہ چھاتی پہ سانپ پھرنے لگا

وہ ضرب گیت کی ایسی کہ تار ٹوٹ گیا

کسی سے ایک تعلق کے ٹوٹتے ہی یہاں

اِک آسمان مِرے سر پہ یار ٹوٹ گیا

کہیں پڑوس میں طبلے کی تھاپ سے صادق

کسے خبر کہ دلِ سوگوار ٹوٹ گیا

ولی صادق