وجہ فروغ چہرۂ خوباں تمہی تو ہو

عارفانہ کلام، حمد، نعت، منقبت

وجہِ فروغِ چہرۂ خوباں تمہیﷺ تو ہو

آب و ہوائے فصلِ بہاراں تمہیﷺ تو ہو

تازہ ہے جس سے رُوئے نگاراں تمہی تو ہو

پُرخم ہے جس سے زُلفِ عروساں تمہی تو ہو

صحرا ہیں جس سے رشکِ گلستان تمہی تو ہو

ذرے ہیں جس سے خلد بداماں تمہی تو ہو

روشن سبھی چراغ تمہارے چراغ سے

کہتے ہیں جس کو بوذر و سلماں تمہی تو ہو

جس کی جھلک سے وادئ ایمن بھڑک اٹھی

اس نورِ برق پاش کے طوفاں تمہی توہو

جلووں سے جس کے زندگی گرمِ سفر ہوئی

اس صبح نور بہار کے ساماں تمہی تو ہو

کیوں کر تمہاری بات نہ ہو حرفِ آخریں

مضمونِ کائنات کے عنواں تمہی تو ہو

نذر صابری