جان بہاراں کب آؤ گے
جانِ بہاراں کب آؤ گے؟
درد کے درماں کب آؤ گے
کب آؤ گے میرے پیا تم
حاصلِ ارماں کب آؤ گے
ٹوٹ رہی ہیں میری امیدیں
صاحبِ پیماں کب آؤ گے
چوکھٹ سُونی سُونی سی ہے
شامِ چراغاں کب آؤ گے
میری چھت بھی روشن کر دو
ماہِ درخشاں کب آؤ گے
آنکھیں رستہ دیکھ رہی ہیں
میرے نگہباں کب آؤ گے
کشتی میری ڈوب نہ جائے
نوحِ غریباں کب آؤ گے
سُونی مانگ یہی کہتی ہے
لے کر افشاں کب آؤ گے
زہرا علوی
No comments:
Post a Comment