تم یوں ہی سمجھنا کہ فنا میرے لیے ہے

 تم یوں ہی سمجھنا کہ فنا میرے لیے ہے

پر غیب سے سامانِ بقا میرے لیے ہے

پیغام ملا تھا جو حسین ابنِ علی کو

خوش ہوں وہی پیغامِ قضا میرے لیے ہے

یہ حورِ بہشتی کی طرف سے ہے بلاوا

لبیک کہ مقتل کا صِلا میرے لیے ہے

کیوں جان نہ دوں غم میں تِرے جب کہ ابھی سے

ماتم یہ زمانے میں بپا میرے لیے ہے

میں کھو کے تِری راہ میں سب دولتِ دنیا

سمجھا کہ کچھ اس سے بھی سوا میرے لیے ہے

توحید تو یہ ہے کہ خدا حشر میں کہہ دے

یہ بندہ دو عالم سے خفا میرے لیے ہے

سرخی میں نہیں دستِ حنا بستہ بھی کچھ کم

پر شوخئ خونِ شہداء میرے لیے ہے

راحل ہوں مسلمان بصد نعرۂ تکبیر

یہ قافلہ یہ بانگِ درا میرے لیے ہے

انعام کا عقبٰی کے تو کیا پوچھنا لیکن

دنیا میں بھی ایماں کا صِلا میرے لیے ہے

کیوں ایسے نبی پر نہ فدا ہوں کہ جو فرمائے

اچھے تو سبھی کے ہیں برا میرے لیے ہے

اے شافعِ محشر جو کرے تو نہ شفاعت

پھر کون وہاں تیرے سوا میرے لیے ہے

اللہ ہی کے رستے میں موت آئے مسیحا

اکسیر یہی ایک دوا میرے لیے ہے

کیا ڈر جو ہو ساری خدائی بھی مخالف

کافی ہے اگر ایک خدا میرے لیے ہے

جو صحبتِ اغیار میں ہو اس درجہ بیباک

اس شوخ کی سب شرم و حیا میرے لیے ہے

ہے ظلم بہت عام تِرا پھر بھی ستمگر

مخصوص یہ اندازِ جفا میرے لیے ہے

مولانا محمد علی جوہر