دور اس دنیا سے ہو کوئی جہاں میرے لئے​

 دُور اس دنیا سے ہو کوئی جہاں میرے لیے​

اس جہاں میں تو نہیں امن و اماں میرے لیے

اک جہاں جس میں نہ ہو فکر و تردد کا ہجوم​

اک جہاں جس میں نہ ہو شو ر و فغاں میرے لیے​

اک جہاں جس میں نہ ہو کچھ ما و تُو کا امتیاز​

اک جہاں آزادِ قیدِ این و آں میرے لیے​

اک جہاں جس میں نہ ہو علم و خرد کی دار و گیر​

ہو نہ جس میں کاوشِ سودوزیاں میرے لیے​

اک جہاں جس میں نہ ہو بُغض و عداوت کا وجود​

اور محبت ہی محبت ہو جہاں میرے لیے​

اک جہاں جس میں مجھے امن و فراغت ہو نصیب​

زندگی جس میں نہ ہو بارِ گراں میرے لیے​

اک جہاں جس میں مِرا قول و عمل ہو معتبر​

ہر قدم پر ہوں نہ جس میں امتحاں میرے لیے​

بے ریائی ہو جہاں کے رہنے والوں کا شعار​

اور محبت میں صداقت ہو جہاں میرے لیے​

ظاہر و باطن جہاں کے بسنے والوں کا ہو ایک​

ہوں نہ خنجر آستینوں میں نہاں میرے لیے​

زندگانی ہو جہاں اک خواب شیریں کے مثال​

ہر نفس جس کا ہو عمرِ جاوداں میرے لیے​

جس کا ہر ذرہ ہو اک دنیا ئے ناپیدا کنار​

جس کا ہر قطرہ ہو بحرِ بے کراں میرے لیے​

جلیل قدوائی