محبت غم ہے عشق اک روگ ہے

 محبت

محبت غم ہے

عشق اک روگ ہے

یہ کج نگاہی اہلِ دنیا کی

تمہیں ذوقِ تصوف اور کچھ شاید کہے لیکن

مجھے باور کرو گی

خیر کچھ بھی ہو

تمہیں آج اک اچھوتے راز سے آگاہ کرتا ہوں

تمہارے شاعروں کے دل

یہ کیا کہتی ہو؟

دل

اے وائے نادانی

نہیں، یہ دل نہیں

ہاں، لوتھڑے ہیں گوشت کے، خوں کے

اور ان کے جسم 

غمگیں مقبرے ہیں ان کی روحوں کے

محبت نور ہے

اِک جاوِدانی نور ہے

اے سلمےٰ

کہ جس کے جلوۂ سوزاں سے ہے روحانیت تاباں

مسرت کھیلتی ہے شاد کامِ آرزو ہو کر

جمال و ناز و موسیقی کی رنگیں، دلستاں پریاں

صداقت، درد اور معصومیت کی دلنشیں حوریں

محبت کی حریمِ قُدس میں اک رقص کرتی ہیں

حسیں فطرت کی زیبائی میں سو سو رنگ بھرتی ہیں

نوائے وقت کی اک راگنی منظوم ہوتی ہے

جہاں میں زندگی ہی زندگی معلوم ہوتی ہے

تصدق حسین خالد