اِس بار اُس نے اپنے مقدر کو داد دی
جب عشق نے بُلا کے قلندر کو داد دی
پہلے تو سب خدا سے مدد مانگتے رہے
دریا رُکا تو لوگوں نے پتھر کو داد دی
مجھ کو مِرے وجود کا باطن بچا گیا
باہر نے ہنس کے پھر مِرے اندر کو داد دی
مُنصف مزاج شخص تھا سو مُنصفی بھی کی
کم تر کو حوصلہ دیا، بہتر کو داد دی
قاتل کو ڈھونڈ کر تو سپاہی نے جان دی
خبروں کی سُرخیوں نے سب افسر کو داد دی
یہ کس کے ہاتھ سے اسے خیرات مل گئی
سِکے نے آج دستِ گداگر کو داد دی
مصور عباس
No comments:
Post a Comment