جمال یار تو ہے اور میں ہوں

 جمالِ یار تو ہے اور میں ہوں

کمالِ آرزو ہے اور میں ہوں

مِری تنہائی بزم آرائی سی ہے

وہ میرے چار سُو ہے اور میں ہوں

نہیں جُنبش لبوں کو چاہ کر بھی

مقامِ گفتگو ہے اور میں ہوں

مِری خاموشیاں بھی چیختی ہیں

صدائے ہا و ہو ہے اور میں ہوں

نہ پوچھو حاصلِ صحرا نوردی

قبائے بے رفو ہے اور میں ہوں

عذابِ تشنہ کامی اوج پر ہے

تلاشِ آب جو ہے اور میں ہوں

تعاقب میں ہیں جھگڑے دو جہاں كے

مِرے پیچھے عدو ہے اور میں ہوں

بہرصورت یہیں جینا ہے، اے دل

جہانِ تند خو ہے اور میں ہوں

سخاوت تیری اے ساقی! کہاں ہے

مِرا خالی سبو ہے اور میں ہوں

جیالوں کا یہی تمغہ ہے عابد

چُھری زیبِ گلو ہے اور میں ہوں

عرفان عابد