وہ آئے گا کہ آنے میں ذرا سی دیر لگتی ہے
بھرم ہے ٹوٹ جانے میں ذرا سی دیر لگتی ہے
دِیا محفوظ کر لو تاک میں ظالم ہوا بیٹھی
کہ اپنا گھر جلانے میں ذرا سی دیر لگتی ہے
ذرا محتاط رہنا آہ سے بھی ٹوٹ جاتا ہے
کسی کا دل دُکھانے میں ذرا سی دیر لگتی ہے
شکستہ سانس تک الفت کو سینے سے لگا رکھنا
یہاں میّت اُٹھانے میں ذرا سی دیر لگتی ہے
محبت آزمانے میں تو صدیاں بیت جاتی ہیں
محبت ٹوٹ جانے میں ذرا سی دیر لگتی ہے
اسے اپنا بنانے میں ہوں اپنا آپ کھو بیٹھا
سنا تو تھا منانے میں ذرا سی دیر لگتی ہے
کُھلی زلفیں کبھی دستِ حنا چادر کبھی سرکی
اُسے چہرہ چُھپانے میں ذرا سی دیر لگتی ہے
سبیلِ اشک سے لکھو دلیلِ آہ شیدا جی
غزل کو داد پانے میں ذراـسی دیر لگتی ہے
علی شیدا
No comments:
Post a Comment