کیا ضروری ہے دل کا ہونا بھی

 کیا ضروری ہے دل کا ہونا بھی

ایسے دل ڈولتا ہے پنجرے میں

جیسے نوکِ سناں پہ دھڑکن ہو

آخری شب ہو جیسے زنداں میں

سانس سینے میں یوں اٹکتی ہے

جیسے شہ رگ میں ریت بھر جائے

درد رگ رگ کو چیرتا جائے

روح بے تاب ہو نکلنے کو

خارزاروں میں یوں الجھ جائے

جیسے اک آہنی قفس کے ساتھ

کوئی نخچیر سر کو ٹکرائے

واپسی کی نہیں کوئی صورت

اب نہیں کوئی راہ جینے کو

ہے عجب لطف اشک پینے میں

کچھ نہیں کچھ نہیں ہے جینے میں

روگ سارے ہیں دل کے ہونے سے

کیا ضروری ہے روگ رونا بھی

کیا ضروری ہے دل کا ہونا بھی

ناز بٹ