Slain-figures
کولمبیا کے دور دراز دیہاتوں میں
کوکین کی کاشت سے پابندی اٹھا دی گئی ہے
شمالی پرتگال کی سرخ ماؤں کے سپنے
سنہرے تمباکو کے کھیتوں میں جوان ہوتے ہیں
چیری کے جنگلوں کی عقبی سمت سے
نیلے پرندے کے سر جھٹکنے سے پہلے
بانس کی پٹڑی پر
ہوا کی ریل غصے بھری سیٹی بجاتی ہے
بھیڑوں کے محافظ کتے کی نیند خراب ہوتی ہے
وقت کی وادی میں سوئی ہوئی
صدی کے وحشی ہونٹوں کو
مفرور لمحہ چوم سکتا ہے
٭جیک ڈینیئلز کا مسخ شدہ لیبل
بوتل کی راکھ سونگھتا ہے
کاسنی محبوبہ کی برہنہ پیٹھ پر
سرمئی ناول کا ہاتھ رینگتا ہے
ضبط کی دیوار میں پیوستہ
شیلف کی چھاتی پر اوندھے منہ پڑے
پیلے اور بوسیدہ مسودوں سے
جسم کی رومانویت کو جاتا رستہ
جس کی ساکن آغوش میں
نظم کے سگریٹ زدہ ہونٹوں سے گرتی
نقرئی جھریوں کے لاشے اونگھ رہے ہیں
سارے منظر کو ایک الماری گھور رہی ہے
پنکھے کی بھنبھناہٹ سو رہی ہے
حسن علوی
٭JackDaniel's
No comments:
Post a Comment