آیات والضحٰی میں فترضٰی تمہی تو ہو

عارفانہ کلام نعتیہ کلام

آیاتِ والضُحٰی میں فتَرضٰی تمہیؐ تو ہو

بخشش کا عاصیوں پہ در وا تمہی تو ہو

جس نے خدا کے پیکرِ حسن و جمال کو

اپنی کُھلی نِگاہ سے دیکھا، تمہی تو ہو

جس نے خدا سے نعمتِ فردوس کے عوض

ہر اُمتی کی جان کو خریدا، تمہی تو ہو

اُمی لقب ہو،۔ صاحبِ اُم الکتاب ہو

ہے یہ کتاب جس کا قصیدہ تمہی تو ہو

اوجِ کمالِ فن ہو کہ آرائشِ سخن

اس کَج کُلاہِ عِلم کا طُرہ تمہی تو ہو

اقصٰی کی سرزمین فلسطینیوں کا خون

ہے جس کے انتظار میں آقاؐ تمہی تو ہو

لب غیر کے لیے نہ کُھلے جس کے آج تک

مدح سرا ادیب ہے جس کا، تمہی تو ہو

ادیب رائے پوری