صرف شبیر کا ہوتا نہیں سر نیزوں پر

 عارفانہ کلام حمد نعت منقبت

صرف شبیرؑ کا ہوتا نہیں سر نیزوں پر

اس جگہ دین بھی کرتا ہے سفر نیزوں پر

ہاں وہی بیبیاں خیموں میں تلاوت کرتی

شان سے جاتے ہوئے ان کے پسر نیزوں پر

شاہ کی گود میں اصغرؑ ہیں لہو میں ڈوبے

دشمنِ آلِؑ پیمبرﷺ کی نظر نیزوں پر

غیر ترتیب سے اُڑتی ہوئی میدان میں دُھول

ایک ترتیب سے رکھے ہوئے سر نیزوں پر

غور سے دیکھ تو جبریلؑ ہے سہما سہما 

اور کچھ لوگ ہیں بے خوف و خطر نیزوں پر

ایک آیت کا سفر ہے سرِ صحرائے عرب

اک تلاوت ہے بہ اندازِ دگر نیزوں پر

میں نے دیکھا تھا انہیں خواب میں نیزے پہ کبھی

اب گزرتے ہیں مِرے شام و سحر نیزوں پر

اس سے بڑھ کر کوئی قربانی نہیں دُنیا میں 

کیا ہی بہتر ہے کہ آرب ہو اگر نیزوں پر

آرب ہاشمی