عارفانہ کلام حمد نعت منقبت
جب گردشِ کونین کا عرفان ملے گا
ہر دائرہ حیدرؑ کا ثنا خوان ملے گا
یہ سینۂ حیدرؑ ہے کہ جُزدانِ ازل ہے
انجیل سے پہلے یہاں قُرآن ملے گا
مُڑ شہرِ نجف کی طرف اے راہئ فردوس
اس موڑ سے رستہ تجھے آسان ملے گا
یہ در ہے درِ مظہرِ اسرار و عجائب
اس در پہ تو جبریلؑ بھی حیران ملے گا
واللہ پڑھو عقدِ محمدﷺ ابو طالبؑ
خطبے کو بھی الحمد کا عنوان ملے گا
کنکر نے قریب آ کے کہا حارثِ بدبخت
لَوٹے گی تِری سانس نہ پالان ملے گا
اے معنئ مولا میں اُلجھتے ہوئے مُلّا
تُو حشر تلک یوں ہی پریشان ملے گا
اُدھڑے ہوئے تالو پہ دھڑکتے ہوئے نعرے
میثم کی دُکاں سے ہی یہ سامان ملے گا
اتمامِ علیؑ دانی ہے اک پشتۂ حیرت
اس بند سے آگے کہیں سلمانؓ ملے گا
اقرارِ ولایت کا بدل تیغ ہو جس جا
اک حُجرؓ وہاں بھی علی الاعلان ملے گا
ہے سُوقِ اُمیّہ سے الگ حیدری بستی
بچہ بھی یہاں صاحبِ ایمان ملے گا
اسلوب اساطیری، لب و لہجہ غدیری
آسان کہاں ایسا سخن دان ملے گا
دلّی بھی دبستاں ہے کراچی بھی دبستاں
٭ٹکسس میں بھی اک ایسا دبستان ملے گا
عارف امام
٭(Texas)
No comments:
Post a Comment