گلی گلی میں اذاں ہے حسین زندہ باد

 عارفانہ کلام حمد نعت منقبت

گلی گلی میں اذاں ہے، حُسینؑ زندہ باد

یزیدِ وقت کہاں ہے؟، حسینؑ زندہ باد

نبیﷺ کی آلؑ کا غم باضمیر آنکھوں سے

مثالِ اشک رواں ہے، حسینؑ زندہ باد

میں بے سہارا نہیں زندگی کے جنگل میں

مِرا امامِ زماںؑ ہے، حسینؑ زندہ باد

لہو میں بولتا منشور آدمیّت کا

بہ ریگِ دشت عیاں ہے، حسینؑ زندہ باد

خدا کی نہ سے جڑا ہے، حسینؑ کا انکار

خدا کی ہاں ہے تو ہاں ہے، حسینؑ زندہ باد

حدودِ خُلد میں اُن بستیوں کا چرچا ہے

علم وفا کا جہاں ہے، حسینؑ زندہ باد

ہم اپنی جیت کا کرتے ہیں برملا اظہار

ہماری چھت پہ نشاں ہے، حسینؑ زندہ باد

نبھا رہی ہے مِری رُوح ایک ہی وعدہ

ازل سے وردِ زباں ہے، حسینؑ زندہ باد

حسنین محسن