والفجر چاندنی کا ہے آنچل لیے ہوئے

 عارفانہ کلام حمد نعت منقبت

والفجر چاندنی کا ہے آنچل لیے ہوئے

والتّین ڈالی دینے کو ہے پھل لیے ہوئے

واللیل بہر چشم ہے کاجل لیے ہوئے

والشّمس آگے آگے ہے مشعل لیے ہوئے

والفتح خوش ہے دیکھ کے حسنِ شباب کو

والعادیات تھامے ہوئے ہے رکاب کو

ہے گونج طبلِ کلمۂ طیب کی تا سما

طاسے خدا کی حمد کے بجتے ہیں جا بجا

گویا شہادتین کا ہے جھانج برملا

تکبیرِ جبرئیل ہے شہنائی کی صدا

نعروں سے گونجتی ہے فضا دو جہان کی

نقارے ہیں درُود کے نوبت اذان کی

برپا ہے جشنِ مرتضویؑ تا بہ لا مکاں

حُوروں میں رَت جگا ہے سجائی گئی جَناں

زُہراؑ نے اپنے رقص سے باندھا ہے، وہ سماں

خُود جھُومتا ہے وجد میں طاؤسِ آسماں

بزمِ طرب میں عالمِ بالا شریک ہے

وہ بھی شریکِ حال ہے جو لا شریک ہے

نسیم امروہوی