راز حیات کیا یہ بتایا ہے آپ نے

 عارفانہ کلام حمد نعت منقبت

رازِ حیات کیا یہ بتایا ہے آپﷺ نے

مجھ کو مِرے خدا سے ملایا ہے آپﷺ نے

بھٹکے ہوئے تھے راہ سے اہلِ زمین سب

رستہ جو عین حق تھا دکھایا ہے آپﷺ نے

باطل کے زیرِ سایہ تھے ہم مُبتلائے شرک

بس اک خُدا، خُدا ہے بتایا ہے آپﷺ نے

عقل و خِرد، قلم، مِرے مالک کی ہے عطا

شیریں سخن زباں کو بنایا ہے آپﷺ نے

ابرک! دُعا نہ پھر تِری کیوں کر قبول ہو

حرفِ دُعا جو تجھ کو سکھایا ہے آپﷺ نے

اتباف ابرک